رضاعة ابني 1 و 2و 3 حكايات زهرة
المحتويات
كريم.. تعبانة وهتفضح والناس هتقول عليا مجنونة!.
في اللحظة دي، الغموض كله اتمسح من قدام عيني.. وعرفت إننا مش قدام مرض عضوي ولا نفسي، إحنا قدام حاجة تانية خالص.. عمل أو مس أو سحر. افتكرت على طول خناقة أمي وحماتي في المستشفى، وافتكرت إن أمي من زمان بتؤمن بالحاجات دي، وحماتي كمان كانت دايماً تروح لدجالين ومشايخ بحجة فك العمل والرقية.
قولت لنفسي مش يمكن حد فيهم هو اللي عمل كدة؟ مش يمكن الغل والحقد اللي بينهم وصل لدرجة إنهم يدمروا بيتي ويسلطوا على مراتي وابني الأذى ده؟.
تاني يوم الصبح، مكنش ينفع أسكت. رنا كانت دبلانة والواد عياطه مبيسكتش من الجوع والصفرا بتزيد. أخدت إجازة من الشغل، وكلمت صاحبي مصطفى، وهو شاب متدين جداً وبيفهم في أمور الرقية الشرعية والقرآن. حكيتله كل حاجة في التليفون من طقاطق للسلام عليكم. مصطفى سكت شوية وقالي بصوت قلقان يا كريم، اللي أنت بتحكيه ده مش مس عادي
اللي أنت بتحكيه ده مش مس عادي.. ده إما سحر أسود مرشوش أو مدفون، أو رصد متسلط عليها عشان يدمر حياتها ويموت ابنها.. أنا جيلك حالاً ومعايا شيخ ثقة بيعالج بالقرآن بس، ملوش في الدجل والكلام الفاضي.
ساعتين وكان مصطفى ومعاه الشيخ عبد الرحمن، راجل وقور، وشه منور بالصلاة والتقوى، ولحيته بيضا
دخلنا غرفه النوم، رنا كانت قاعدة وضامة يوسف وبتترعش. أول ما شافت الشيخ عبد الرحمن، وشها اتقلب فجأة! ملامحها الرقيقة اختفت، وظهرت عليها علامات الغضب والغل، وصوتها اتغير تماماً وبقى غليظ وحاد وقالت مش هتلحقوها.. دي بتاعتي، والواد ده هيموت.. هيموت!.
أنا ركبي سابت، ومصطفى مسكني. الشيخ عبد الرحمن محتزش ولا خاف، بالعكس.. قعد على كرسي قبال رنا، وطلع مصحف صغير من جيبه، وقال بصوت قوي ومزلزل أعوذ بالله من الشيطان الرجيم.. بسم الله الرحمن الرحيم. وبدأ يقرأ آيات أبطال السحر، وسورة البقرة، وآية الكرسي ويفضل يكررها وَلَا يَئُودُهُ حِفْظُهُمَا ۚ وَهُوَ الْعَلِيُّ الْعَظِيمُ.
مع كل آية كان الشيخ بيقرأها، رنا كانت بتصرخ صراخ يقطع القلب.. صراخ مكنش طالع من حنجرة ست أبدًا! كانت بتتلوى على السرير وجسمها يتشنج، وعينيها تبرق وتطلع لفوق والشهقة المرعبة دي بدأت تتكرر ورا بعض كأنها بتموت!
الشيخ عبد الرحمن كان صوته بيعلى بالقرآن أكتر وأكتر، ويزعق ويسأل من أنت؟ وما الذي أتى بك إلى هنا؟!.
صوت غريب وطالع من جوة رنا رد وهو بيضحك بامتزاج مع بكاء وغل أنا الخادم.. أنا الرصد.. معمول ليها عمل
الشيخ عبد الرحمن زعق فيه وقرأ قَالَ مُوسَىٰ مَا جِئْتُم بِهِ السِّحْرُ ۖ إِنَّ اللَّهَ سَيُبْطِلُهُ ۖ إِنَّ اللَّهَ لَا يُصْلِحُ عَمَلَ الْمُفْسِدِينَ، وفضل يكرر إن الله سيبطله.. إن الله سيبطله ويجيب مية ويقرأ عليها ويرش على وش رنا.
فجأة، رنا اتنفضت نفضة جامدة جداً، وخرجت منها شهقة عالية وطويلة سدت ودانا كلنا، وبعدها وقعت على السرير جثة خامدة، مغمى عليها تماماً.. بس المرة دي، وشها كان هادي، ومكنش متشنج.
الشيخ عبد الرحمن مسح عرق جبينه وبصلي وقال بنبرة حزينة يا بني، مراتك معمول لها سحر أسود وسفلي شديد جداً.. السحر ده معمول بغرض المرض، وإنها متفرحش بضناها، ويموت ابنها من الجوع أو تموت هي وهي بترضعه. السحر ده معمول على أثر من لبسها، ومدفون أو محطوط في مكان قريب منها جداً.. من ريحة كلام الجني، السحر ده حد من أهلها أو أهلك هو اللي عمله!.
الدنيا اسودت في عيني.. أمي؟ ولا حماتي؟!. افتكرت الخناقة والردح والغل اللي شوفته في عيونهم يوم الولادة. مشيت في الشقة زي المجنون.. السحر فين يا شيخنا؟ أدور فين؟.
الشيخ قال دور في الحاجات اللي جاتلك هدايا بعد الولادة، أو في لبسها
فضلت أنا ومصطفى نقلب الشقة حتة حتة.. فتشنا الدولاب، المطبخ، المراتب، السجاد.. ملقيناش حاجة. لحد ما مصطفى قالي كريم.. في شنطة هدايا كبيرة اهي في الصالة، بتاعة السبوع والزيارات اللي جاتلكوا، فتشتها؟.
قولتله لأ.. دي هدايا من أمي وحماتي وقرايبنا لسه مفتحنهاش من يوم ما رجعنا.
جريت على الشنطة وفتحتها.. كان فيها طقم سرير، وهدوم للبيبي، وعلبة حلاوة مغلفة. بدأت أطلع الحاجات.. لحد ما مسكت علبة الحلاوة الكبيرة. العلبة كانت مقفولة بلصق شفاف، بس لما هزيتها، حسيت إن في حاجة تقيلة جوة بتتحرك مش حركة حلاوة.
فتحت اللصق بسرعة وفتحت العلبة.. وشوفت الكارثة!
تحت قالب الحلاوة، كان في كيس أسود صغير ملفوف بلصق كتير. قطعت اللصق بإيدي وبقيت بترعش.. وطلعت اللي جوة الكيس.
كانت عروسة قماش صغيرة بيضا، ملفوف عليها قفل حديد ومقفول بمفتاح، ومغروس في صدر العروسة وفي بطنها دبابيس كتير جداً! ومكتوب على القماش بدم لونه أسود وريحتة معفنة رنا بنت فاطمة.. تُمنع من المرضعة، وتشهق للموت، ويهلك ولدها يوسف بن كريم.
أنا لما قريت الاسم.. صرخت صرخة هزت الشقة. العلبة دي بالذات.. أنا فاكر كويس مين اللي جابها! دي العلبة اللي حماتي دخلت بيها الشقة
متابعة القراءة
